काठमाडौँ । मोरङको कानेपोखरीस्थित जनमुखी बचत तथा ऋण सहकारी संस्थाले एकल पुरुष सेयर सदस्यलाई मासिक एक सय रुपैयाँ भत्ता दिने भएको छ । सहकारीको ३४औं वार्षिक साधारणसभाले एकल पुरुषलाई मासिक भत्ता दिने निर्णय पारित गरेको हो ।
संस्थाले यसअघि ७० वर्षमाथिका २६ जना सेयर सदस्यलाई मासिक एक सय रुपैयाँ पोषण खर्चबापत दिँदै आएको थियो ।
सभामा नेफ्स्कुनका पुर्व संचालक गोमा नेपालले ठुला सहरका ठुला सहकारीले समुदायमा आधारित सहकारीलाई बदनाम गराएको बतईन् । उनले समुदायमा आधारित सहकारी संस्थाले ग्रामिण अर्थतन्त्रलाई चलायमान बनाएको बताउँदै विपन्न वर्गका लागि ग्रामिण क्षेत्रका सहकारी वरदान साबित भएको उल्लेख गरिन् ।
एक करोड ८६ लाख ८६ हजार सेयर पुँजी रहेको जनमुखी सहकारी संस्थामा एक हजार २०८ जना सेयर सदस्य छन् । ९ करोड ७९ लाख १५ हजार ३ सय ३७ हजार रुपैयाँ बचत निक्षेप रहेको संस्थाले गत आर्थिक वर्षमा ९ करोड ९७ लाख ९० हजार ९ सय ८२ रुपैयाँ ऋण लगानी गरेको छ ।
