काठमाडौँ । हाथवे इन्भेष्टमेन्ट कम्पनी लिमिटेडले कम्पनीको प्रमुख कार्यकारी अधिकृत (सीइओ)लाई नै सदस्य सचिव राखेर लेखापरीक्षण समिति गठन गरेको छ । लेखापरीक्षणको सामान्य सिद्धान्तविपरित कम्पनीले सीइओलाई नै सदस्य सचिव राखेर लेखापरीक्षण समिति बनाएको हो ।

सामान्यतया लेखापरीक्षण भनेको सीइओले नेतृत्व गरेको कामको लेखाको परिक्षण गर्ने हो । सो समितिमा सीइओ नै सदस्य सचिव हुँदा स्वार्थको द्वन्द हुने हुनाले लेखापरीक्षण समितिमा सीइओ राख्न मिल्दैन । तर, लेखापरिक्षणको यो सामान्य सिद्धान्तमाथि नै धावा बोल्दै हाथवेले मनपरी ढंगबाट लेखापरीक्षण समिति बनाएको हो ।

कम्पनीका सीइओ सन्दीप शाहले आफुले पनि बस्न नमिल्ने भनेको तर संचालकहरुले बस्नैपर्ने भनेपछि बसेको बताए । अर्थ सरोकारसँग कुराकानी गर्दै शाहले सुरुमा सीइओ लेखापरीक्षण समितिमा बस्न नहुने राय आफुले पनि राखेको तर अन्य कम्पनीमा पनि सो अभ्यास रहेको भन्ने जानकारी आएपछि आफु सो समितिमा बसेको बताए ।

‘मैले पनि मिल्दैन भन्ने राय राखेकै हो । पछि केहि कम्पनीहरुमा पनि सीइओ सो समितिमा बसेको भन्ने जानकारी पाएपछि म पनि बसेको हुँ । अझ थप बुझ्छु । केहि समस्या देखिने नभए सो समिति छोड्छु ।’ शाहले अर्थ सरोकारसँग भने ।

‘तपाईंकै कामको लेखापरीक्षण गर्ने हो, अनि तपाईं नै सदस्य बस्न त सामान्य नियमले पनि दियो र ?’ हाम्रो प्रश्नमा उनले भने, ‘मैले पनि मिल्दैन नै भनेको हो । म पनि सिए फेट्रनिटिकै भएकाले मैले पनि यो चासो राखेकै हो । तर पछि मिलिहाल्छ भन्ने कुरा आएपछि म बसेँ । विवाद भयो भने म बस्दिन ।’

यता नेपाली लेखा व्यवसायको नियमनकारी निकाय नेपाल चार्टड एकाउन्टेन्ट्स संस्था (आइक्यान)का निमित्त कार्यकारी निर्देशक  किरण खत्रीले पनि  सीइओ नै लेखापरीक्षण समितिमा हुनु  गलत भएको बताएका छन् । ‘अडिट कमिटिले केहि काम विशेषले वा केहि कुरामा सोधनी गर्दा सीइओलाई बोलाउने प्रचलन छ, जुन अन्यथा भएन । तर सीइओ नै अडिट कमिटिमा बस्नुचाहिं गलत भयो ।’

आइक्यानकै पार्षदले पनि यो काम गलत भएको दाबी गरेका छन् ।  ‘यो त आफैँ  के जाति आफैँ झाँक्री भईहाल्यो नि ।’ अर्थ सरोकारसँग कुराकानी गर्दै एक पार्षदले भने ‘यो मनपरीको हद हो । त्यस्तो कमिटिको काममा म संग्लन हुन्न भनेर लेखापरिक्षकले भन्न सक्नुपर्छ ।’