काठमाडौँ । वर्ल्ड लिंक कम्युनिकेसनले नेपाल दूरसञ्चार प्राधिकरणलाई तिर्न बाँकी बक्यौता तिरेको छ । वर्ल्ड लिंकले रोयल्टी र ग्रामीण दूरसञ्चार विकास कोष (आरटीडीएफ) बापतको २ अर्ब १५ करोड १४ लाख ७ हजार ५ सय ५२ रुपैयाँ तिरेको हो ।
जसमध्ये वर्ल्ड लिंकले १ अर्ब ३८ करोड ९० लाख रुपैयाँ रोयल्टी र आरटीडीएफ बापतको शुल्क ७६ करोड २३ लाख ९५ हजार रुपैयाँ तिरेको प्राधिकरणले जनाएको छ ।
प्राधिकरणलाई तिर्नुपर्ने रोयल्टी र आरटीडीएफबापतको बक्यौता तिरेपछि कम्पनीको इजाजतपत्र नवीकरणसहितको काम अघि बढ्ने प्राधिकरणले जनाएको छ । त्यसका लागि प्राधिकरणबाट आवश्यक निर्णय हुन भने बाँकी छ ।
यसो त वर्ल्ड लिंकले रोयल्टी र आरटीडीएफ बापतको शुल्क तिर्नु नपर्ने भन्दै सर्वोच्चमा रिटसमेत दायर गरेको थियो । तर, सर्वोच्चले बैशाख ३० गते उक्त रिट खारेज गर्दै कार्तिक १३ गते शुल्क तिर्नुपर्ने सहितको पूर्णपाठ सार्वजनिक गरेपछि वर्ल्ड लिंकले प्राधिकरणलाई उक्त शुल्क बुझाएको हो ।
