काठमाडौँ । अनलाइन सट्टेबाजी गराएको आरोपमा थप तीन जना पक्राउ परेका छन् । कीर्तिपुरको त्रिवि क्रिकेट रंगशालामा चलिरहेको नेपाल प्रिमियर लिग (एनपीएल)मा सट्टेबाजी गराएको आरोपमा तीन जना पक्राउ परेका हुन् ।
उनीहरुलाई प्रहरीको केन्द्रीय अनुसन्धान ब्युरो (सीआईबी)को टोलीले पक्राउ गरेको हो ।
पक्राउ पर्नेमा सन्दीपकुमार सिंह, रोहित शर्मा र प्रिन्स सिंह रहेका छन् । उनीहरुलाई त्रिवि क्रिकेट मैदानबाटै पक्राउ गरिएको सीआईबीका एसपी होबिन्द्र बोगटीले जानकारी दिएका छन् ।
सीआईबीले यसअघि सोमबार दुई र मंगलबार दुई गरी चार जनालाई सट्टेबाजी गराएको आरोपमा पक्राउ गरेको थियो । उनीहरुले नेपालमा पूर्ण रुपमा बर्जित अनलाइन बेटिङ एपमार्फत सट्टेबाजी खेलाएको पाइएको सीआईबीले जनाएको छ ।
यसो त एनपीएलमा खुलेयाम भइरहेको सट्टेबाजीमा एनपीएलकै आयोजकको मिलेमतो भएको चर्चा चलिरहेको छ । अझ एनपीएलमा सहभागी भएका टिमहरुले त जर्सीमै कानूनविपरीत अनलाइन सट्टेबाजी प्लेटफर्मको प्रचार गरिरहेका छन् । तर, यति हुँदा पनि प्रहरी सट्टेबाजीमा संलग्न भीआईपीहरुसम्म पुग्न नसकेको आरोप लागिरहेको छ । यद्यपि प्रहरीले एनपीएलमा भइरहेको सट्टेबाजीको विषयमा गहन रुपमा प्रहरीले अनुसन्धान र संलग्नलाई पक्राउ गर्ने काम गरिरहेको बताएको छ ।
