काठमाडौँ । पोखरा फाइनान्स संकटग्रस्त अवस्थामा पुगेको पाइएको छ । राष्ट्र बैंकले गरेको स्थलगत सुपरीवेक्षणका क्रममा फाइनान्सको वित्तीय अवस्था खराब रहेको पाइएको हो ।
राष्ट्र बैंक स्रोतका अनुसार फाइनान्समा कम धितोमा धेरै ऋण प्रवाह भएको, करोडौँ ऋण उठ्न बाँकी रहेको र ठूलो ऋण नउठ्ने जोखिम रहेको पाइएको छ । समग्रमा फाइनान्सको वित्तीय अवस्था झनझन् खस्किँदै गएपछि कम्पनीलाई राष्ट्र बैंकले सुधारात्मक कारवाही गर्ने तयारी थालेको पनि स्रोतले बताएको छ ।
यता पोखरा फाइनान्सले पनि राष्ट्र बैंकले २०८० पुषमा स्थलगत निरीक्षण गरेका र सुधारका लागि आवश्यक निर्देशन दिएको स्वीकारेको छ ।
फाइनान्स एक उच्च अधिकारीका अनुसार स्थलगत निरीक्षणका क्रममा फाइनान्सको खराब कर्जाले सीमा नाघेको देखिएपछि राष्ट्र बैंकले ऋण असुलीमा ध्यान दिन निर्देशन दिएको थियो । हाल फाइनान्सले राष्ट्र बैंकको निर्देशन अनुसार नै काम गरिरहेको ती अधिकारीले दाबी गरे ।
तर, सुध्रिनुको साटो फाइनान्सको वित्तीय अवस्था झन् बिग्रिएपछि सुधारात्मक कारवाहीको तयारी भइरहेको राष्ट्र बैंक स्रोतले बताएको छ । पछिल्लो ९ महिनामा मात्रै फाइनान्सको खराब कर्जा २०३ प्रतिशतले बढेको देखिन्छ । जुन तथ्य स्वयम् फाइनान्सले प्रकाशित गरेको वित्तीय विवरण उल्लेख छ । यसो त कम्पनी चालु आर्थिक वर्षको पहिलो त्रैमासमा ४ करोड ९० लाख रुपैयाँ घाटामा छ ।
