काठमाडौँ । सूर्यदर्शन सहकारी ठगी प्रकरणमा पक्राउ परेका राष्ट्रिय स्वतन्त्र पार्टी (रास्वपा)का सभापति रवि लामिछानेलाई धरौटी बुझाएलगत्तै काठमाडौँ ल्याउने तयारी गरिएको छ ।
बिहीबार कास्की जिल्ला अदालतले रविलाई ६५ लाख धरौटीमा छोड्न आदेश दिएसँगै धरौटी बुझाएर रिहा हुनेबित्तिकै प्रहरीले उनलाई काठमाडौँ ल्याउने तयारी गरेको हो ।
काठमाडौँमा रविसहित ३९ जनाविरुद्ध काठमाडौँको कालिमाटीस्थित स्वर्णलक्ष्मी सहकारी प्रकरणमा सहकारी ठगी र संगठित अपराधको कसुरमा मुद्दा दायर भएको छ । काठमाडौँमा पनि रविविरुद्ध मुद्दा दायर भएकाले उनी कास्कीबाट रिहा भएपछि काठमाडौँ पठाउने तयारी भइरहेको प्रहरी स्रोतले बताएको छ ।
काठमाडौँको स्वर्णलक्ष्मी सहकारीमा रविसहितका ३९ जनाविरुद्ध ६ सय ९० जना बचतकर्ताको १ अर्ब १९ करोड ३० लाख ९० हजार ४ सय ९३ रुपैयाँ हिनामिना गरेको आरोप छ ।
बिहीबार जिल्ला अदालत कास्कीका न्यायाधीश नीतिज राईको इजलाशले रवि लामिछानेलाई ६५ लाख र पूर्वडिआईजी छविलाल जोशीलाई ८८ लाख धरौटीमा छोड्न आदेश दिएको छ ।
