काठमाडौँ । पटकपटक बिग्रिरहने नेप्सेको थोत्रो सिस्टम आइतबार पनि बिग्रिएपछि सेयर लगानीकर्ताले नेप्सेको विकल्प खोज्नुपर्ने आवाज उठाएका छन् ।
आइतबार कारोबार समयमै वाईकोले बनाएको सिस्टम बिग्रिँदा कारोबार नै नहुने समस्या देखिएको थियो । यतिमात्र होइन, भित्रभित्रै डाटा लिकेजको समस्या पनि देखिएको थियो ।
तर, बेला बेलामा बिग्रिएर लाखौँ लगानीकर्तालाई मर्कामा पारिरहने नेप्सेको सिस्टममा फेरि पनि त्यही नियति दोहोरिएपछि लगानीकर्ताले नेप्सेको विकल्प खोज्नुपर्ने आवाज उठाएका छन् । अधिकांश लगानीकर्ताले नेप्सेको सिस्टम बेला बेलामा बिग्रिरहनुले नयाँ स्टक एक्सचेञ्जको अपरिहार्यतालाई थप बल दिएको प्रतिक्रिया दिएका छन् ।
यता वाईकोसँग मिलेर बजारमा कर्नरिङ गर्ने गरेको आरोप लाग्दै आएको नेप्से यसपटक पनि सिस्टममा देखिएको समस्यालाई सामान्य समस्या भनेर पन्छिएको छ ।
तर, आइतबार टिएमएसमा देखिएको समस्या सामान्य नभएर नियोजित रुपमै बिगारिएको आरोप सेयर लगानीकर्ताहरुले लगाएका छन् । उनीहरुले नेप्सेको थोत्रो सिस्टम नै बजारको दिगो विकासमा अवरोध भएको भन्दै नेप्सेको विकल्पमा नयाँ स्टक एक्सचेञ्ज कुनै हालतमा ल्याउनुपर्ने आवाज उठाएका छन् । हाल लगानीकर्ताले सामाजिक सञ्जालमा ‘कारोबार गर्न पाइँदैन, नेप्सेको थोत्रो सिस्टम चाहिँदैन’ भन्दै नेप्सेको व्यापक विरोध गरिरहेका छन् ।
