काठमाडौँ । काठमाडौँमा कुलमान घिसिङ र राजाको पक्षमा नारा लगाउने अमेरिकी नागरिकलाई देश निकाला गरिने भएको छ । अमेरिकी नागरिक ५८ वर्षीय जुलियन क्रिपा ब्लिसलाई देश निकाला गरिने भएको हो ।
उनी गत चैत १४ गते काठमाडौँको माइतीघरबाट पक्राउ परेका थिए ।
राष्ट्रिय प्रजातन्त्र पार्टी (राप्रपा)ले कुलमानको समर्थनमा आयोजना गरेको प्रदर्शनमा उनले ‘कुलमान घिसिङ हामी तिम्रो साथमा छौँ’ भन्ने प्लेकार्ड लिएर नारासमेत लगाएका थिए । कुलमानसँगै उनले सो प्रदर्शनमा राजाको पक्षमा पनि नारा लगाएका थिए ।
प्रदर्शनस्थलबाट पक्राउ परेका ब्लिसलाई थप अनुसन्धानका लागि अध्यागमन विभाग पठाइएको थियो । उनीमाथि अनुसन्धान गरेर विभागले उनलाई देश निकाला गर्ने निर्णय गरी सोही अनुसार प्रक्रिया अघि बढाएको छ । देश निकालासँगै उनलाई आगामी दुई वर्ष नेपाल आउन प्रतिबन्ध लगाइएको छ । यद्यपि उनले बयानमा आफू राजनीतिक कार्यक्रममा सहभागी हुन त्यहाँ नपुगेको बरु कसैले प्लेकार्ड दिएर त्यहाँ पुगेको बताएका छन् ।
