काठमाडौँ । भाटभटेनी सुपरमार्केटका सञ्चालक मीनबहादुर गुरुङले चैत १५ गतेको ‘तीनकुने घटना’ मा ज्यान गुमाएका दुईजनाको परिवारलाई आर्थिक सहयोगको घोषणा गरेका छन् । गुरुङले एभिन्युज टेलिभिजनका क्यामरा पर्सन सुरेश रजक र सविन महर्जनको परिवारलाई आर्थिक सहयोग गर्ने घोषणा गरेका हुन् ।
गुरुङले सुरेश रजकको परिवारलाई ५ लाख रुपैयाँ र सविन महर्जनको परिवारलाई ३ लाख रुपैयाँ आर्थिक राहत प्रदान गर्ने घोषणा गरेका छन् ।
चैत १५ गते आन्दोलनका क्रममा तोडफोड र लुटपाट गर्नेबाट थप क्षति हुनबाट कोटेश्वरको भाटभटेनीलाई जोगाउने सुरक्षा गार्डसहित ५० बढी कर्मचारीलाई सम्मान गर्दै गुरुङले रजक र महर्जनको परिवारलाई आर्थिक सहयोगको घोषणा गरेका हुन् ।
सोही कार्यक्रममा भाटभटेनीले १५ गतेको घटनामा बहादुरी देखाउने सुरक्षा गार्ड दुलप्रसाद पराजुलीलाई ५ लाख रुपैयाँ नगद पुरस्कार र पाँच ग्रेड बढुवाको सम्मान प्रदान गरेको छ । त्यसबाहेक भाटभटेनीले लुटपाट र तोडफोडमा भाटभटेनीलाई जोगाउन भूमिका खेल्ने अन्य कर्मचारीहरुलाई पनि पुरस्कार र सम्मान प्रदान गरेको छ ।
