काठमाडौँ । जेठ महिनाका लागि वाणिज्य बैंकहरुले ब्याजदर सामान्य घटाएका छन् । बैशाखको तुलनामा बैंकहरुले निक्षेपको ब्याजदर ०.०२७५ प्रतिशतविन्दुले घटाएका हुन् ।
वाणिज्य बैंकहरुले प्रकाशित गरेको नयाँ ब्याजदर अनुसार जेठ महिनामा व्यक्तिगत मुद्दती निक्षेपको ब्याजदर ५.९५२ प्रतिशतबिन्दुमा झारिएको छ । बैशाख महिनामा यस्तो ब्याजदर ५.९७९५ प्रतिशतबिन्दु रहेको थियो ।
जेठ महिनाका लागि २० वाणिज्य बैंकमध्ये तीन वाणिज्य बैंकले ब्याजदर घटाएका छन् । त्यस्तै, १४ वाणिज्य बैंकले बैशाख महिनाकै ब्याजदरलाई निरन्तरता दिएका छन् भने ३ बैंकले ब्याजदर बढाएका छन् ।
जेठका लागि नेपाल इन्भेष्टमेन्ट मेगा बैंकले सबैभन्दा धेरै १ प्रतिशतबिन्दुले ब्याजदर घटाएको छ । बैशाखामा व्यक्तिगत मुद्दती निक्षेपको ब्याजदर ६.५ प्रतिशत रहेको इन्भेष्टमेन्ट मेगा बैंकले जेठमा घटाएर ५.५ प्रतिशतमा झारेको छ । अन्य दुई कुमारी बैंक र सिद्धार्थ बैंकले जेठका लागि व्यक्तिगत मुद्दती निक्षेपको ब्याजदर क्रमशः ०.२५ र ०.०१ प्रतिशतबिन्दुले घटाएका छन् ।
त्यस्तै, नेपाल बैंक, सानिमा बैंक र एभरेष्ट बैंकले जेठका लागि व्यक्तिगत मुद्दती निक्षेपको अधिकतम ब्याजदर बढाएका छन् । जसमध्ये सबैभन्दा धेरै सानिमा बैंकले ०.३८ प्रतिशतबिन्दु बढाएको छ ।
