काठमाडौँ । मितेरी सहकारीको रकम अपचलन प्रकरणमा फरार रहेका एकजना कम्बोडियामा पक्राउ परेका छन् । रेड कर्नर नोटिस जारी भएका ज्योति बहादुर भण्डारी कम्बोडियामा पक्राउ परेका हुन् । 

प्रहरी स्रोतले दिएको जानकारी अनुसार कम्बोडियामा पक्राउ परेका भण्डारीलाई नेपाल फिर्ता ल्याउन हाल नेपाल प्रहरीको टोली कम्बोडिया जाने तयारीमा छ ।

यसो त भण्डारी केही महिनाअघि नै पक्राउ परेको बताइएको छ । तर, कम्बोडिया प्रहरी किन पक्राउ गर्यो ? भन्ने खुलाइएको थिएन । यद्यपि रेड कर्नर नोटिस जारी गरेर उनलाई इन्टरपोलमार्फत नेपाल ल्याउने प्रक्रिया अघि बढाइएको थियो । 

सहकारी ठगी प्रकरणका मुख्य आरोपित समेत रहेका भण्डारीले क्रिप्टोमा लगानी गर्ने भन्दै सहकारीबाट पैसा लगेको प्रहरीको केन्द्रीय अनुसन्धान ब्युरो (सीआईबी)को अनुसन्धानबाट खुलेको छ । उनलाई कम्बोडियाबाट नेपाल ल्याएर सीआईबीकै जिम्मा लगाइनेछ ।

प्रहरीले सोही सहकारी ठगी प्रकरणमा नेपाली काँग्रेसका सांसद एवम् उपसभापति धनराज गुरुङकी पूर्वपत्नी ज्योति गुरुङविरुद्ध पनि रेड कर्नर नोटिस जारी गरेको थियो । सांसद् गुरुङसँग पनि प्रहरीले पटकपटक बयान लिइसकेको छ ।