काठमाडौँ । समस्याग्रस्त पाँच सहकारीका ऋणीलाई भदौभित्र ऋण तिर्न ताकेता गरिएको छ । सिभिल, दर्शन, नेशनल नमोबुद्ध, लालीगुराँस र सुमेरु सहकारीका ऋणीलाई बागमती प्रदेश सरकारले भदौ मसान्तभित्र कुनै हालतमा ऋण तिर्न ताकेता गरेको हो ।
प्रदेशको सहकारी तथा गरिबी निवारण मन्त्रालय अन्तर्गतको समस्याग्रस्त सहकारी व्यवस्थापन समितिको कार्यालयले सार्वजनिक सूचना नै जारी गरेर सहकारीका ऋणीलाई ऋण तिर्न ताकेता गरेको हो ।
सो सूचना अनुसार समस्याग्रस्त पाँच सहकारीका ऋणीलाई भदौ ३१ गतेभित्र सहकारी संस्था समस्याग्रस्त घोषणा हुनुभन्दा एक दिन अघिसम्मको ऋण तिर्न भनिएको छ । भदौ ३१ गतेभित्र पनि ऋण नतिरे साँवा, ब्याज र हर्जानासमेत गरी ऋण असुल गर्ने र थप कानूनी कारबाहीको प्रक्रिया अघि बढाइने चेतावनी समेत दिइएको छ ।
सरकारले सिभिल सहकारीलाई २०८० भदौ २१ गते, दर्शन सहकारीलाई २०८१ कात्तिक ११ गते, नेशनल नमोबुद्ध, लालीगुराँस र सुमेरु सहकारीलाई २०८१ पुस २८ गते समस्याग्रस्त घोषणा गरेको थियो ।
