काठमाडौँ । हरि सिलवाल राष्ट्रिय वाणिज्य बैंकको सञ्चालक बनेका छन् । प्रचलित व्यवस्था विपरीत हुनेगरि उनी राष्ट्रिय वाणिज्य बैंकको सञ्चालक बनेका हुन् ।
यसो त सिलवालले गत साता अर्थ मन्त्रालयबाट बैंक सञ्चालकको नियुक्ति लिएका थिए । तर, सञ्चालकको नियुक्ति लिँदासम्म उनी सोही बैंकको ऋणी थिए । उनले गाडी किन्नका लागी राष्ट्रिय वाणिज्य बैंकबाट अटो लोन लिएका थिए ।
प्रचलित व्यवस्था अनुसार बैंकको ऋण सोही बैंकको सञ्चालक बन्न पाइन्न । तर, सो व्यवस्थाको धज्जी उडाउँदै सिलवाल बैंकको सञ्चालक बनेका छन् । उनको सञ्चालक नियुक्तिको विषयमा बैंकभित्रै विवाद छ । बैंकभित्र भएकै विवादका कारण यसअघि उनको सपथ समेत रोकिएको थियो ।
तर, हाल उनी सोही विवादकै बीच बैंकको सञ्चालक बनेका छन् । यता बैंकले पनि ऋणी सोही बैंकको सञ्चालक बन्न नपाइने बताएको छ । अर्थ सरोकारसँग कुराकानी गर्दै बैंकका गुनासो सुनुवाइ अधिकृत उभर पाण्डेले ऋणी सोही बैंकको सञ्चालक बन्न नपाउने बताए । ‘उहाँ बैंकको सञ्चालक बन्नुभएको छ ।’, उनले भने, ‘तर ऋणी त बैंकको सञ्चालक बन्नै मिल्दैन ।’
