काठमाडौँ । सर्लाहीको छिमेक लघुवित्तमा लुटपाट भएको पाइएको छ । सर्लाहीको लालबन्दीस्थित छिमेक लघुवित्तको शाखामा लुटपाट भएको इलाका प्रहरी कार्यालय लालबन्दीका प्रमुख तथा प्रहरी निरीक्षक विरेन्द्रसिंह जोखारीले पुष्टि गरेका छन् ।

प्रहरी निरीक्षक (इन्स्पेक्टर) जोखारीका अनुसार लघुवित्तमा मास्क लगाएर आएका ३ देखि ४ जनाको समूहले लुटपाट गरेका हुन् । 

कार्यालय बन्द हुने बेलामा एक्कासी कार्यालय प्रवेश गरेर अज्ञात समूहले लुटपाट गरेको जोखारीले बताए । ‘छिमेक लघुवित्तमा लुटपाट भएको हो ।’, अर्थ सरोकारसँग कुराकानी गर्दै उनले भने, ‘३-४ जना मास्क लगाएर आएका अपरिचित व्यक्तिहरुले लुटपाट गरेको भन्ने छ ।’

इन्स्पेक्टर जोखारीका अनुसार लघुवित्तको कार्यालयभित्र प्रवेश गरेर भएको लुटपाटमा लघुवित्तमा ऋण लिन आएका व्यक्तिको साथबाट एक लाख रुपैयाँ लुटिएको दाबी गरिएको छ । 

‘लघुवित्तमा ऋण लिन आएका व्यक्तिको एक लाख रुपैयाँ लगिएको भनिएको छ ।’, उनले भने, ‘के मा चढेर आए ? के मा गए ? भन्ने थाहा छैन । आवाज सुन्दा मोटरसाइकलमा गएको हुनसक्ने भनिएको छ । थप अनुसन्धान गर्दैछौँ ।’