काठमाडौँ । सहकारीहरुले धितो नै नहेरी ‘हचुवा’को भरमा ऋण दिने गरेको पाइएको छ । राष्ट्रिय सहकारी नियमन प्राधिकरणको स्थलगत निरीक्षणका क्रममा अधिकांश सहकारीहरुले धितो नहेरी ऋण दिने गरेको पाइएको हो । 

प्राधिकरणले केही ठूला सहकारीहरुमा गरेको स्थलगत अनुगमनबाट सहकारीहरुले धितो भनेर ल्याइएका कागजका भरमा ऋण दिने गरेको खुलेको छ । 

यतिसम्म कि सहकारीहरुले कागजकै भरमा लाखौँ रुपैयाँ ऋण दिने र खराब कर्जामा पनि नोक्सानी व्यवस्था नगरेको पाइएको छ । अर्कोतर्फ परिवारकै सदस्य संस्थाको उच्च व्यवस्थापनमा हावी हुँदा मनपरी पैसा चलाउने, असुली गरिएको ऋण नवीकरण नगर्ने तथा ‘डिफल्ट लोन’ असुलीमा बेवास्ता गर्ने गरेको पनि पाइएको छ ।

अधिकांश सहकारीमा परिवारकै सदस्य ऋण समिति र धितो मूल्यांकन समितिमा हुँदा सहकारीमा मनपरी बढेको प्राधिकरणले निष्कर्ष निकालेको छ । 

अर्कोतर्फ पुराना र समस्यामा परेका ठूला सहकारीमा ठूलो रकम जम्मा गरेका ठूला बचतकर्ताहरुले स्रोत नखुलेको रकम जम्मा गरेको आशंका गरिएको छ ।