काठमाडौँ । समस्याग्रस्त सहकारी व्यवस्थापन समितिले सहकारीका सञ्चालकले लुकाएको सम्पत्तिबारे सूचना मागेको छ । समस्याग्रस्त २३ वटा सहकारीका सञ्चालकको नाम सार्वजनिक गर्दै समितिले उनीहरुले लुकाएको सम्पत्तिबारे पनि सूचना मागेको हो । 

समितिले समस्याग्रस्त सहकारीका सञ्चालक, उनीहरुका परिवार, आफन्त, नातागोता र अन्य व्यक्तिको नाममा सम्पत्ति लुकाएको जानकारी भए सो जानकारी दिन अनुरोध गरेको छ । 

त्यस्तै, समितिले सहकारीका सञ्चालकहरुले सम्बन्धित संस्थाको दायित्व फरफारक, ऋण असुली, सम्पत्ति र अन्य स्रोत साधनको पहिचान गरी सोको व्यवस्थापन गर्ने र नियमित रुपमा समितिको सम्पर्कमा रही बचत फिर्ता, दायित्व व्यवस्थापन र नियमन कार्यमा सहयोग गर्न आग्रह गरेको छ ।

त्यसका बावजुत पनि सूचनाको अटेर गरे कानून अनुसार कारवाही हुने तथा सम्पत्ति जफत गरिने समितिको कार्यालयले चेतावनी दिएको छ ।