काठमाडौँ । तत्कालीन गृहमन्त्री सुदन गुरुङमाथि छानविन गर्न ५ दिन समय थपिएको छ । मंगलबारदेखि लागू हुनेगरी छानविन समितिले ५ दिनको समय थपेको हो । 

छानविन समितिका अध्यक्ष अच्युतमप्रसाद भण्डारीका अनुसार समितिले गुरुङसँग बयान लिइसकेको छ । 

विवादास्पद व्यवसायी दीपक भट्टसँग साझेदार रहेको आरोपपछि उनले पदबाट राजीनामा दिएका थिए । त्यसपछि उनीमाथि छानविन गर्न सरकारले उच्च अदालतका पूर्वन्यायाधीश अच्युतप्रसाद भण्डारीको नेतृत्वमा छानविन समिति गठन गरेको थियो । 

समितिमा महालेखा नियन्त्रक शोभाकान्त पौडेल र सहन्यायाधिवक्ता अच्युतमणि न्यौपाने सदस्य छन् । उक्त समितिलाई छानविन गर्न सुरुमा १५ दिनको म्याद दिइएको थियो । सो समय सोमबार सकिएको छ । 

योसँगै समितिले छानविनका लागि थप ५ दिनको म्याद थप गरेको छ । पाँच दिनको म्याद आज (मंगलबार) देखि लागू हुनेछ ।