आइक्यानले एक पटकमा २५ जना सहभागी गराउने र आधा घण्टाको ब्रेक पछी पुन: चुनाव संचालन गर्नेगरी तयारी गरेको जानकारी प्रशासनलाई गराएको छ । तर कोहि मतदाताहरु पनि पालो कुरेर आइक्यान जान्छन् भन्ने तर्क नै हाँसउठ्दो छ । चुनाव गर्नैपर्ने भएकाले अनुमति लिन आइक्यानले जिल्ला प्रशासन कार्यालयमा २ पेज लामो निवेदन दिएको छ । जसमा चुनावमा भीडभाड नहुने, भौतिक दुरी कायम गरिने जस्ता कुराहरु उल्लेख गरिएका छन्। तर व्यवहारिक रुपमा चुनावमा यो सम्भव नभएको धेरैको तर्क छ । एक पटकमा २५ जना सहभागी गराएर आधा घण्टाको ब्रेक गर्नेगरी अनुमति लिइएकोले यदी त्यस्तो गरियो भने १२ घण्टाको चुनावमा दुई दिन गरेर चुनाव त सकिन्छ तर यो नियम पालना हुने भने देखिंदैन । आइक्यानमा भीडभाड गर्न नदिएको खण्डमा वरपरका होटल रेष्टुरेन्टहरुमा सो दिन ठुलो भीड लाग्ने देखिन्छ । कोरोना महामारीकै बेलामा कुनै प्रशासनले यति धेरैमान्छे जम्मा हुनेगरी अनुमति नै दिएको यो पहिलोपटक हो । अर्कोतर्फ मतदाता नरहेकाहरु पनि चुनाव हेर्न आउनेछन् । उम्मेदवारका स्वयंमसेवकदेखि पत्रकारसम्मको भीड पनि हुने हुनाले चुनावमा राम्रै भीड हुने पक्कापक्की जस्तै छ ।

यता ललितरका प्रमुख जिल्ला अधिकारी ढुण्डी प्रसाद निरौलाले आफुले चुनाव गर्न अनुमति दिएको स्वीकारेका छन् । तर उनले ६ दिन लगाएर चुनाव हुने भनिएको र सोहि अनुसार अनुमति दिएको बताएका छन् । तर चुनाव हुने भनेको ४ दिन हो। र २ दिनको समय मतगणनाका लागि छुट्याईएको हो । ‘भीडभाड भयो, र कोरोना संक्रमण भयो भने त्यसको जिम्मा कसले लिन्छ ?’ हाम्रो प्रश्नमा प्रजिअ निरौलाले भने, ‘भीडभाड भए तत्काल चुनाव रोक्न लगाउँछु । पढेलेखेका चार्टड एकाउन्टेन्टहरुको चुनाव उहाँहरुले सबै नीति नियममा बाँधिएर नै गर्नुहुन्छ भन्ने छ । तलमाथि भए प्रशासनले एक्सन लिन्छ ।’