काठमाडौं । सीबीआईएल क्यापिटल लिमिटेडले वार्षिक साधारणसभा बोलाएको छ । कम्पनीले आगामी कार्तिक ५ गते शुक्रबार १५औं वार्षिक साधारणसभा बोलाएको हो । उक्त सभा बिहान ११ बजे काठमाडौंको डिल्लीबजारस्थित क्यापिटलको रजिष्टर्ड कार्यालयमा हुने भएको छ । सभाले सेयरधनीलाई २५ प्रतिशत नगद लाभांश दिने प्रस्तावलाई पारित गर्ने भएको छ । संस्थाको सञ्चालक समितिको बैठकले चुक्ता पुँजीको २५ प्रतिशत (करसहित) का दरले ५ करोड रुपैयाँ बराबरको नगद लाभांश वितरण गर्ने प्रस्ताव गरेको थियो ।
सभाले आर्थिक वर्ष २०७७/७८ को सञ्चालक समितिको वार्षिक प्रतिवेदन छलफल गरी पारित गर्नेछ । साथै सभाले आर्थिक वर्ष २०७८/७९ को लागि लेखापरीक्षकको नियुक्ति गर्ने र निजको पारिश्रमिक निर्धारण गर्ने सामान्य प्रस्ताव रहेको छ । उक्त सभामा जाने प्रयोजनको लागि क्यापिटलले असोज २० गते क्लोज गर्ने भएको छ । यससँगै असोज १९ गतेसम्म कारोबार गरेका सेयरधनीहरुले मात्र उक्त सभामा भाग लिन र प्रस्तावित नगद लाभांश पाउने भएका छन् ।
