काठमाडौँ । बीमा समितिका अध्यक्ष सूर्यप्रसाद सिलवालले कोरोना बीमाको दाबी भुक्तानी छिट्टै हुने आश्वासन दिएका छन् । मंगलबार बीमा समितिको कार्यालयमा आयोजित नववर्ष २०७९ को शुभकामना आदान प्रदान कार्यक्रममा अध्यक्ष सिलवालले कोरोना बीमाको दाबी भुक्तानी छिट्टै हुने बताएका हुन् ।
अध्यक्ष सिलवालले कोरोना बीमाको दाबी भुक्तानीका सम्बन्धमा अर्थमन्त्री र अर्थ मन्त्रालयका सचिवलगायत पदाधिकारीहरुसँग निरन्तर छलफल गर्नुका साथै समितिबाट विकल्पसहितको प्रस्ताव पठाइएको पनि बताए । चालू आर्थिक वर्षमा बीमा दाबी फछ्र्यौट उल्लेखनीय रुपले बढेको बताउँदै उनले बीमा दाबी भुक्तानीका सम्बन्धमा बीमा समितिमा परेका उजूरीहरु माथि छानविन गरी शीघ्र किनारा लगाउने काम भइरहेको बताए ।
अध्यक्ष सिलवालले चालू आर्थिक वर्षको पहिलो आठ महिनामा नै बीमाको दायरा विस्तार सरकारले चालू आर्थिक वर्षका लागि लिएको ३३.३३ प्रतिशतको लक्ष्यभन्दा पनि बढेर ३५ प्रतिशत नाघेको जानकारी दिए ।
