काठमाडौँ । लघुवित्तबाट ५० हजार रुपैयाँ ऋण लिएर थालेको व्यवसायले कसैलाई करोडको मालिक बनाउन सक्छ भन्दा धेरैलाई अपत्यारिलो लाग्न सक्छ । तर सप्तरीमा टेकमाया सापकोटा यस्तै सुन्दर कथाकि साक्षी भएकी छिन्, जसले महुली लघुवित्त वित्तीय संस्थाबाट निकालेको ५० हजार रुपैयाँले आफ्नो जीवनमात्र परिवर्तन गरिनन्, बरु धेरैका लागि प्रेरणाको स्रोत बन्न सफल भईन् । कुनैबेला घरमा आगो लागेर सर्वश्व गुमाएकी टेकमायाले महुलीको साथबाट गरेको प्रगति धेरैका लागि प्रेरणा त हो नै, लघुवित्तले परिवर्तन गराएको एक आम जीवनको सुन्दर कथा पनि हो ।

कुनै बेला आगोले सर्वश्व गुमाएर जीवन-मरणको दोसाँधमा रहेकी टेकमायाले हिम्मत हारिनन । कसैले पनि साथ नदिंदा महुली लघुवित्तले उनलाई दिएको केहि हजार रुपैयाँ, फगत ऋण भएन, बरु जीवन परिवर्तनको कोशेढुंगा भयो । ५० हजार रुपैयाँबाट सुरु भएको टेकमायाको करोडसम्मको यात्राले लघुवित्तले परिवर्तन गराएका थुप्रै पात्रहरुहरुको प्रतिनिधित्व गर्छ । टेकमाया सापकोटा आमाको जीवन कहानी सुनेपछि हामी उनको सफलतालाई आफ्नै आँखाले हेर्न र महसुस गर्न उनको घरसम्म पुगेका छौँ ।