काठमाडौं । डेटा नष्ट गरेको आरोपमा जेनस सोलुसनका प्रमुख कार्यकारी अधिकृत (सीईओ) प्रशन्न पोखरेल पक्राउ परेका छन् । सुन्दर ग्रुप अफ कम्पनिज प्रालिको अनाधिकृत रुपमा होस्टिङ गरिएको डेटा नष्ट गरी क्षति पुर्याएको भन्दै पोखरेललाई साइबर ब्युरोले पक्राउ गरेको हो ।

सुन्दर ग्रुप अफ कम्पनिज प्रा.लिले कम्प्युटर तथा लेखा सम्बन्धी उपकरणहरुको कारोबार गर्दै आएको थियो । यो सँगै कम्पनीले कम्प्युटरको थोक व्यापार तथा विभिन्न वस्तुको आयात लगायतको काम गर्दे आएको छ । कम्पनीले ग्राहकलाई लक्षित गर्दै तयार गरेको वेब पोर्टल निर्माण गरी सो पोर्टल होस्टिङ जिम्मा जेनस सोलुसन प्रा.लीलाई दिएको थियो । तर, अनाधिकृत रुपमा कम्पनीको एकाउन्टमा प्रवेश गरी पूर्व सूचना सम्पुर्ण डेटा नष्ट गरेको आरोप लागेको छ ।

‘साइबर क्राइम’ अन्तर्गत प्रहरीले सो प्रकरणमा अनुसन्धान सुरु गरेको थियो । अनुसन्धानबाट सो कार्यमा कम्पनीका सीईओ प्रशन्न पोखरेलको संलग्नता रहेको भन्दै पक्राउ गरेको प्रहरीले जनाएको छ । ‘उनलाई अदालतको आदेश अनुसार उनकै कार्यालयबाट पक्राउ गरिएको हो’, प्रहरी स्रोतले भन्यो, ‘भदौ २२ मा पक्राउ परेका पोखरेललाई अदालतबाट तीन दिन म्याद थप गरी थप अनुसन्धान गरेको छ ।’

जेनस सोलुसनको ग्लोबल सीटीओमा अञ्जनीकुमार फुयाँल, पाकिस्तान सीईओमा राजा मेहमूद र बङ्ग्लादेशका लागि प्रबन्ध निर्देशकमा जियाउल हुसेन रहेका छन् । जेनस सोलुसनले आफूलाई अमेजन वेब सर्भिस तथा क्लाउड कन्सल्टिङ कम्पनीको आधिकारिक क्लाउड कन्सल्टिङ प्रदायक दाबी गर्दै आएको छ ।