">
काठमाडौं । काठमाडौं महानगरपालिकाले उपत्यकाभित्र रहेका सम्पूर्ण सहकारीहरुले पुष मसान्तभित्र साधारण सभा सम्पन्न गर्नुपर्ने भएको छ । मंगलबार महानगरले एक सूचना जारी गर्दै काठमाडौं भित्रका सम्पूर्ण सहकारी संस्थाहरुलाई पुष मसान्त २०७९ भित्र साधारण सभा सम्पन्न गर्न निर्देशन दिएसँगै अव पुष मसान्तभित्रमा सभा सम्पन्न गर्नुपर्ने भएको हो ।
पुष मसान्तभित्रमा साधारण सभा सम्पन्न गर्नुपर्नेछ भने साधारण सभा सम्पन्न भएको १५ दिन भित्र साधारणसभाबाट पारित प्रतिवेदन काठमाडौं महानगरपालिका भित्रको सहकारी विभागमा अनिवार्य बुझाउनु पर्नेछ । विगाभले सहकारी संस्थामा सदस्य बनाएर मात्र कारोबार गर्न र सबै सदस्यलाई साधारणसभामा उपस्थितिका लागि आह्वान गर्न समेत सहकारी संस्थाहरुलाई सूचित गरेको छ ।
त्यस्तै महानगरपालिकाले साधारण सभा गर्दा काठमाडौं कार्यक्षेत्र भएका सहकारीले गणपुरक संख्या (५१ प्रतिशत) पुर्याउन समेत निर्देशन दिएको छ । साधारण सभामा भाषण भन्दा बढी एजेन्डामा केन्द्रित गर्न समेत महानगरपालिकाले सहकारीहरुलाई सूचित गरेको छ भने सबै प्रतिवेदनमाथि साधारण सदस्यबीच पर्याप्त छलफल गराएर मात्र प्रतिवेदन पास गर्न समेत भनिएको छ ।
संस्थाको चालु आवको बजेट, नीति तथा कार्यक्रम समेत साधारणसभाबाटै अनुमोदन गराउनु पर्ने छ । महानगरभित्र सञ्चालित सहकारीले तोकिएका शर्त नमानेमा विघटन र दर्ता खारेजीको प्रक्रिया अगाडि बढाइने सूचनामा उल्लेख गरिएको छ ।
