काठमाडौं । उपप्रधान एवम् अर्थमन्त्री विष्णु पौडेलले बर्तमान अवस्थामा मुलुकमा देखिएको समस्या समाधानका लागि नीतिगत रुपमा सच्चिनुपर्ने बताएका छन् । आर्थिक मिडिया सञ्चालक संघ नेपाल (इमान)को आयोजनामा सञ्चालित ‘अर्थतन्त्रका चुनौती र समाधानका उपाय’ विषयक अन्तरक्रिया कार्यक्रममा बोल्दै अर्थमन्त्री पौडेलले अहिलेको आवश्यकता नीतिगत सुधार रहेको बताएका हुन् ।

पछिल्ला दिन तरलता संकट केही सुध्रिएको भए पनि आर्थिक संकट कायमै रहेकोले बेलैमा सुध्रिनुपर्ने अर्थमन्त्री पौडेलले बताए । ‘अहिले हामी जोखिममै छौँ । समस्या पूर्ण रुपमा समाधान भईसकेको छैन । तर, अब पनि सच्चिएनौँ भने स्थिति सहज नहुन सक्छ’, उनले भने, ‘नीतिगत सुधार र अर्थतन्त्र ट्रयाकमा ल्याउन अर्थमन्त्रालयले राष्ट्र बैंकमाथि हस्तक्षेप गर्दैन तर गभर्नरसँग छलफल चाहिँ गर्छौं ।’

उपप्रधान एवम् अर्थमन्त्री विष्णुप्रसाद पौडेलले आगामी आर्थिक वर्षको बजेट ल्याउँदा र चालु आवको बाँकी अवधिका लागि बजेट खर्च गर्दा सरकारको क्षमता र आवश्यकता हेरेर अघि बढ्ने बताएका छन् ।

त्यस्तै, आगामी आर्थिक वर्षको बजेट निर्माणको काम सुरु भइसकेको र सरकारले नीतिगत फड्को (पोलिसी डिपार्चर) लाई केन्द्रमा राख्दै वास्तविकतामा आधारित बजेट ल्याउने पौडेलले बताए । ‘आगामी आर्थिक वर्षको स्रोतको अनुमान र बजेटको आकारमाथि छलफल सुरु भइसकेको छ । अहिलेकै अवस्थामा अघि बढ्ने नभई पोलिसी डिपार्चर आवश्यक छ भनेर विभिन्न क्षेत्रबाट सुझाव आइरहेका छन्’, उनले भने, ‘त्यसमा विशेष ध्यान दिएर बजेटको आकारमा यथार्थपरकता खोज्नेछौँ ।’

सरकारले अहिले चालु खर्च कटौतीको नीति लिएको र यो पर्याप्त नरहेको पनि अर्थमन्त्री पौडेलको भनाइ छ । त्यस्तै, उनले बजेट खर्चमा मात्र नभई राजस्व सङ्कलनमा पनि सरकारले लक्ष्य भेटाउन नसकेको उल्लेख गर्दै यसमा पनि गम्भीर समीक्षा गर्ने बताएका छन् । ‘राजस्व सङ्कलनमा यो वर्षको लक्ष्य भेटाउन नसकेको मात्र होइन गत वर्षको भन्दा न्यून राजस्व उठेको छ’, उनले भने, ‘यसमा गम्भीर समिक्षा हुन्छ ।’