काठमाडौं । पूर्व गृहमन्त्री खाँणको मोबाइल फर्म्याट भएको पाइएको छ । नक्कली भुटानी शरणार्थी प्रकरणमा पक्राउ परेका खाँणको मोबाइल ‘चेक’ गर्दा मोबाइल फर्म्याट भएको पाइएको हो ।
बुधबार आफ्नै निवासबाट पक्राउ परेका खाँणको साथबाट बरामद गरिएको मोबाइलको डेटा अनुसन्धान गर्दा मोबाइल फर्म्याट भएको खुलेको थियो । मोबाइलमा अधिकांश डेटा ‘मिसिङ’ पाएपछि हाल प्रहरीले उनको मोबाइल रिकभरीका लागि प्रयोगशाला पठाएको छ ।
खाँणको मोबाइल फर्म्याट हुनुले ठगीमा उनको पनि संलग्नता छ भन्ने आशंका गर्ने थुप्रै ठाउँ छोडेको छ । यसो त यसअघि पक्राउ परेका सचिव टेकनारायण पाण्डेको मोबाइल पनि फर्म्याट भएको थियो । तर, डेटा रिकभरी गर्दा उक्त प्रकरणमा पूर्वगृहमन्त्री खाँण र उनका स्वकीय सचिव नरेन्द्र केसीको संलग्नताको थप प्रमाण फेला परेको थियो । ‘खाँणको मोबाइल रिकभरीका लागि पठाईसकेका छौँ ।’, एक प्रहरी अधिकृतले भने, ‘रिकभरी गर्दा थप प्रमाण भेटिन्छ कि भन्ने छ ।’
यसअघि पक्राउ परेका सचिव पाण्डेको मोबाइलमा खाँणले पठाएको म्यासेज भेटिए पनि सोही म्यासेज खाँणको मोबाइलमा नभेटिएपछि प्रहरी उनको मोबाइल फर्म्याट भएको निश्कर्षमा पुगेको हो ।
प्रहरीले खाँणले प्रयोग गर्ने ‘सिम’को सिडिआर (कल डिटेल) भने यसअघि नै निकालिसकेको छ । उक्त सिडिआरमा खाँणले नक्कली भुटानी शरणार्थी प्रकरणमा मुछिएका व्यक्तिहरुसँग पटक–पटक संवाद गरेको पाइएको थियो । उक्त डिटेलअनुसार सो प्रकरणका बारेमा खाँणले सबैभन्दा बढी संवाद पूर्वगृहसचिव पाण्डेसँग गरेको खुलासा भएको छ ।
बुधबार पक्राउ परेका खाँणको अझैसम्म पनि बयान लिने काम भएको छैन । हाल उनी जिल्ला प्रहरी परिसर काठमाडौंको हिरासतमा छन् ।
