काठमाडौं । विद्युतीय सवारी साधनमा लगानी गर्न प्रभु बैंकले ५० लाख डलर बराबरको ऋण सुबिधा प्राप्त गरेको छ । बैंकले विश्व वातावरण दिवसको दिन लक्जम्बर्गको एमएसएमई ईन्टरप्राईजेज बन्ड एसएबाट सो ऋण सुविधा प्राप्त गरेको हो ।
हरित लगानी अन्तर्गत विद्युतीय सवारी साधनहरूमा लगानी गर्न ४ बर्ष अवधिका लागि उक्त ऋण सुविधा पाएको बैंकले जनाएको छ ।
लक्जम्बर्गको एमएसएमई ईन्टरप्राईजेज बन्ड एसएबाट प्राप्त भएको उक्त ऋण सुविधा सार्वजनिक यातायात र ब्यक्तिगत प्रयोजनका लागि प्रयोग हुने विद्युतीय सवारीसाधनहरू खरीद तथा आयातका लागि सहज रुपमा उपलब्ध गराइने प्रभु बैंकका प्रमुख कार्यकारी अधिकृत (सीईओ) अशोक शेरचनले जानकारी दिएका छन् ।
बैंकले वैकल्पिक उर्जा तथा एमएसएमई व्यवसाय प्रवद्र्धनका लागि अन्य अन्तराष्ट्रिय संस्थाहरुसँग पनि सहकार्यका लागि पहल गरिरहेको र उक्त पहलले छिट्टै मुहुर्त रुप लिने विश्वास लिएको छ ।
