काठमाडौं । माल्टा पठाईदिन्छु भन्दै रकम ठगी गर्ने व्यक्ति पक्राउ परेका छन् । बैतडी जिल्ला दशरथचन्द नगरपालिका वडा न. ०४ स्थाई घर भई हाल ललितपुर महानगरपालिका वडा नं. १६ भैसिपाटी बस्ने ३५ वर्षीय रमेश बडु पक्राउ परेका हुन् ।
उनले कुम्भराज जोशी सहित ५ जनालाई वैदेशिक रोजगारीको लागि माल्टा पठाईदिन्छु र माल्टा पुगेपछि होटेलमा काम लगाईदिन्छु, मासिक १ लाख ५० हजार तलब हुन्छ भनि विश्वास दिलाई प्रलोभनमा पारेर रकम ठगी गरेका थिए । उनले पीडितहरुबाट पटक पटक गरी १३ लाख १५ हजार रकम लिई सम्पर्क विहीन भएका थिए ।
काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले उनलाई असोज ६ गते किर्तिपुरबाट पक्राउ गरेको हो । पक्राउ परेका बडुलाई थप अनुसन्धान तथा कारवाहीका लागि वैदेशिक रोजगार विभाग पठाईएको प्रहरीले जनाएको छ ।
