काठमाडौँ । नेपाल धितोपत्र बोर्डका अध्यक्ष रमेश कुमार हमालले हकप्रद जारी गर्ने कम्पनीको भाउ घट्नुपर्ने भए पनि नेपालमा त्यसको ठिक विपरित राइट ल्याउने कम्पनीको भाउ बढिरहेकोले त्यस विषयमा अनुसन्धान गर्ने बताएका छन् । आइतबार काठमाडौँमा धितोपत्र ब्रोकर एसोसिएसन र अर्थ सरोकारले संयुक्त रुपमा आयोजना गरेको ‘विश्व लगानिकर्ता सप्ताह २०२३ अन्तर्क्रिया तथा समापन’ कार्यक्रममा बोल्दै उनले यस्तो बताएका हुन् ।
‘राइट ल्याउने कम्पनीको भाउ घट्नुपर्नेमा नेपालमा बढिरहेको छ । राइट ल्याउने कम्पनीको भाउ घट्नैपर्छ, कसरी बढ्यो अनुसन्धान गर्छौँ ।’ उनले भने ।
लगानीकर्ताको प्रश्नको जवाफ दिंदै उनले आफु आफ्नो इक्षाले बोर्डको अध्यक्ष नभएको भन्दै सरकारले निमन्त्रणा गरेर आफु बोर्ड अध्यक्ष भएकोसमेत दाबी गरे । उनले आफु अध्यक्ष भएपछि बोर्डमा तजबिजी र मान्छेको टाउको हेरेर स्वीकृत गर्ने प्रणाली हटेकोसमेत दाबी गरे ।
बुक बिल्डिङमा विधिमार्फत आईपीओ ल्याउनुपर्नेमा प्रिमियममा आईपीओ ल्याएर बोर्ड पोलिसी करप्सनमा लागेको सेयर लगानीकर्ता तिलक कोइरालाको आरोपकोसमेत बोर्ड अध्यक्ष हमालले प्रतिवाद गरे । आफ्नो प्रश्नबाट करप्सन भन्ने शब्द हटाउन आग्रह गर्दै हमालले तथ्य नबुझी अरुको चरित्रमाथि प्रश्न उठाउन ठिक नहुने बताए । बुक बिल्डिङ्ग राम्रो पक्ष भएपनि समस्याको सबै समाधान भने नभएको हमालको भनाई छ ।
दशैंअघि मार्जिन लेण्डिङ्गको कार्यविधि ल्याउने तयारी बोर्डको भएको बताउँदै उनले लगानीकर्ता र बजारको हितका लागि बोर्ड अहोरात्र लागिरहेकोसमेत बताएका छन् ।
