काठमाडौँ । आइएचएको उपाध्यक्षमा सुशील पोखरेल निर्वाचित भएका छन् । बिजबेलका संस्थापकसमेत रहेका युवा जलविद्युत् उद्यमी सुशील पोखरेल २०२३-२५ का लागि इन्टरनेशनल हाइड्रोपावर एसोसिएसन (आइएचए) को उपाध्यक्षमा निर्वाचित भएका छन् ।
विकासोन्मुख यात्रामा अगाडि बढेको देशका लागि विश्व जलविद्युत् मञ्चमा नेपालको यो गौरवपूर्ण उपलब्धि रहेको छ । कात्तिक १४देखि १६ गतेसम्म इन्डोनेसियाको बालीमा आयोजना भएको ‘अन्तर्राष्ट्रिय जलविद्युत् सम्मेलन, २०२३’ को क्रममा पोखरेल उपाध्यक्षमा निर्वाचित भएको घोषणा गरेका थिए ।
त्यस्तै, दूरदर्शी नेतृत्व क्षमता, जलविद्युत् तथा स्वच्छ ऊर्जा विकासमा उनको निरन्तरको लगावका कारण उनलाई उपाध्यक्षमा निर्वाचित गरेका हुन् । उनले एसिया तथा मध्य एसियाका २८ देशलाई नेतृत्व गर्ने बताएका छन् । विश्व जलविद्युत् मञ्चमा भएको उपस्थितिले दिगो स्वच्छ तथा नवीकरणीय ऊर्जा विकासमा कटिबद्ध भएर लाग्ने उनको अभियानलाई प्रोत्साहन मिलेको छ । साथै, नेपालको गरिमालाईसमेत उचाइमा पुर्याएको छ ।
पोखरेलले लामो समयदेखि हरित ऊर्जा र दिगो जलविद्युत् विकासको नीतिगत तहमा बहस तथा पैरवी गर्दै आएका छन् । उपाध्यक्षमा नियुक्त भएसँगै पोखरेलले नेपालको जलविद्युत् क्षेत्रलाई विश्वको लगानीयुक्त गन्तव्य बनाउने अभियानलाई आफूले अझ प्रबलरूपमा अगाडि बढाउने बताएका छन् ।
‘दिगो जलविद्युत् मापनको मापदण्डका आधारमा नेपालका जलविद्युत् आयोजनाहरू प्रमाणीकरण भएका छन् । उनले खुसी व्यक्त गर्दै भने, ‘यसले हामीलाई हरित ऊर्जा विकासमार्फत दिगो भविष्यको आधार निर्माण गर्न पर्याप्त अवसरहरू प्रदान गरेको छ ।’ दिगो जलविद्युत विकासमा अविराम खटिइरहेका पोखरेलले सन् २०३५ सम्म हजार मेगावाट नवीकरणीय ऊर्जा उत्पादन गर्ने एउटा अग्रगामी अभियान लिएर हिँडेका छन् ।
उनले बिजबेल कम्पनीमार्फत मध्य तथा दक्षिण एसियामा हरित ऊर्जामार्फत दिगो भविष्य निर्माण गर्ने अभियानमा आफ्नो गर्विलो पहिचान बनाउँदै अगाडि बढेका छन् । साथै, ३ दिनसम्म भएको सम्मेलनमा विभिन्न देशका ९ सय भन्दा बढी नीति निर्माता, बुद्धिजीवी, कुटनीतिज्ञ तथा जलविद्युत् क्षेत्रमा काम गरिरहेको कम्पनीहरूका प्रतिनिधिहरूको सहभागिता रहेको थियो ।
उक्त, सम्मेलन समापनको दिन जारी ‘बाली घोषणापत्र’ले स्वच्छ तथा नवीकरणीय ऊर्जामार्फत न्यून कार्बनयुक्त अर्थतन्त्र एवम् एकीकृत जलविद्युत् विकास गर्नुपर्नेमा जोड दिएको छ । आइएचएको वर्ष २०२३–२५ को अध्यक्षको नेतृत्व अष्ट्रेलियाका पूर्वप्रधानमन्त्री माल्कोल्म टर्नबुलले गर्ने छन् ।
