काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेले सामाजिक सञ्जाल टिकटक बन्द गर्ने सरकारको निर्णय सही नभएको टिप्पणी गरेका छन् । टिकटक बन्द गर्ने मन्त्रिपरिषद्को निर्णय लगत्तै सामाजिक सञ्जाल फेसबुकमार्फत रविले टिकटक बन्द गर्नु सही नभएको बताएका हुन् । 

त्यस्तै, रविले सामाजिक सञ्जाललाई नियन्त्रण भन्दा पनि नियमन गर्नुपर्ने धारणा व्यक्त गरेका छन् । उनले समस्या विषयवस्तुको भएको भन्दै प्लेटफर्म नै बन्द गर्नु गलत भएको तर्क गरेका छन् । 

‘समस्या कन्टेन्टको हो, प्लेटफर्मको होइन । अराजकता अभिव्यक्तिमा होला, माध्यमको के दोष ?’, रविले लेखेका छन्, ‘टिकटकका कयौँ युजर र कन्टेन्ट खराब छन् तर सबै युजर र कन्टेन्ट खराब छैनन् । प्राविधिक रुपमा खराबलाई कन्ट्रोल गर्न सकिन्छ ।’ त्यस्तै, उनले टिकटकमा गलत गर्नेहरुले अन्य माध्यमबाट पनि गलत गर्न सक्ने भएकाले सबै प्लेटफर्म बन्द गर्ने निर्णय सही नहुने बताएका छन् । 

‘टिकटकमा हालेका भिडियो रिलमा हाल्न मिल्छ, इन्स्टामा हाल्न मिल्छ, फेसबुकमा हाल्न मिल्छ । के सबै प्लेटफर्म बन्द गर्दै जाने हो त ?’, उनले भनेका छन्, ‘यो निर्णय गर्ने सत्ता धारी कै कयौँ भ्रष्ट होलान् । के अब पार्टी नै बन्द गरिदिने हो ? मूलधारले ढोका बन्द गरेका कयौँ प्रतिभाहरु सामाजिक सञ्जालबाट उदाए, मूलधारले लुकाएका कयौँ समाचार सामाजिक सञ्जालले उजागर गरे, सामाजिक सञ्जालले फैलाएका कयौँ अफवाहलाई मूलधारले फेक प्रमाणीकरण गरे । आजको युगमा सोसियल मिडियाको विकल्प सुधारिएको सोसियल मिडिया हो ।’