काठमाडौँ । काठमाडौँमा ऋण तर्न नसकेपछि एक व्यक्तिले आत्महत्याको प्रयास गरेका छन् । शनिबार साँझ फेसबुकमा लाइभ आएर ती व्यक्तिले २८ हजार रुपैयाँ ऋण तिर्न नसक्दा आत्महत्याको प्रयास गरेका हुन् । उनले उक्त ऋण आफूले बाइक किन्नका लागि लिएको बताएका थिए ।
करिब ६ मिनेट फेसबुक लाइभमा बसेका ती व्यक्तिले दुईवर्ष अघि आफूले मोटरसाइकल किन्नका लागि ८ प्रतिशत ब्याजमा २ लाख १५ हजार ऋण लिएको बताएका थिए । सो ऋणबाट उनले यामाहाको रेजेडआर बाइक किनेका थिए । तर, ८ प्रतिशतमा लिएको ऋण १८ प्रतिशत पुगेपछि आफूले किस्ता तिर्न नसकेको उनले बताए । हालसम्म उक्त ऋणको कुल ४ लाख ५४ हजार रुपैयाँ तिरिसक्दा पनि ऋण चुक्ता नभएको उनको भनाई थियो ।
यति रकम तिरिसक्दा पनि किस्ता बुझाउनका लागि टर्चर आउन थालेपछि आत्महत्या गर्ने स्थितिमा पुगेको ति व्यक्तिले बताएका थिए ।
ति व्यक्तिका अनुसार मोरङ अटो वर्कशपका कर्मचारीले बाँकी रहेको २८ हजार रुपैयाँ नबुझाए घरमै आएर बाइक लिलाम गर्ने भन्दै तनाव दिएका थिए । यतिसम्म कि मोरङ अटो वर्कशपका कर्मचारीहरुले मोटरसाइकलको किस्ताका लागि घरै लिलाम गर्ने भन्दै धम्की पनि दिएका थिए ।
त्यस्तै ति व्यक्तिले फेसबुक लाइभमा दुर्गा प्रसाईंले भनेको सही रहेछ भन्दै लाइभमै आत्महत्या गर्ने प्रयास गरे पनि समयमा पुगेको प्रहरीको टोलीले उनलाई जीवितै उद्धार गरेको हो ।
