काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेले अन्य दलबार आएका केही व्यक्तिबाट पार्टीमा खतरा देखिएको बताएका छन् । बुधबार महोत्तरीको जलेश्वरमा पार्टीको केन्द्रीय बैठकमा राजनीतिक प्रतिवेदन पेश गर्दै रविले अन्य दलबाट रास्वपा प्रवेश गरेका केही व्यक्ति गलत प्रवृत्तिका रहेको बताएका हुन् । त्यस्ता व्यक्तिबाट पार्टीलाई खतरा हुनसक्ने रविले औँल्याएका छन् । 

‘केही पूर्व पार्टीकै गलत प्रवृत्ति बोकेर आएको देखिन्छ । फरक राजनीतिक संस्कार र संस्कृतिको पक्षपाती हामीलाई तीमध्ये खराबहरुले क्रमशः दबाब र प्रभावमा पनि पार्न सक्ने देखिन्छ ।’, प्रतिवेदनमा उल्लेख छ । 

त्यस्तै, रविले आफ्नो पार्टीमा अवसर नपाएर व्यक्तिगत स्वार्थका लागि रास्वपामा प्रवेश गर्नेदेखि सावधान रहनसमेत पार्टीका अन्य नेताहरुलाई आग्रह गरेका छन् । 

पछिल्लो समय पुराना दलप्रतिको वितृष्णाका कारण रास्वपाप्रतिको आकर्षण बढ्दो रहेकाले चनाखो हुनुपर्ने रविले बताएका छन् । त्यस्तै, रविले रास्वपामा राम्रा मान्छे आउन नदिनका लागि पनि पार्टी भित्रैबाट प्रयास गरिएको आशंका व्यक्त गरेका छन् । साथै उनले पार्टीभित्र समस्या पार्ने गतिविधि नगर्न र गलत प्रवृत्तिका मान्छेलाई पार्टीमा ल्याउने जस्ता कार्यमा सजग रहन पनि आग्रह गरेका छन् ।