काठमाडौँ । प्राथामिक सेयर निष्कासन (आईपीओ) जारी गर्ने तिव्र तयारीमा रहेको नेपाल विद्युत प्राधिकरणलाई आईपीओ जारी गर्न दिने प्रस्ताव मन्त्रिपरिषद् पुगेको छ । प्राधिकरणलाई प्रिमियम मूल्यमा आईपीओ जारी गर्न दिने प्रस्ताव स्वीकृतिका लागि उर्जा मन्त्रालयले मन्त्रिपरिषद्मा पेश गरेको हो ।
जारी पुँजी ३ खर्ब पुर्याएर त्यसको १० प्रतिशत सेयर सर्वसाधारणमा जारी गर्ने तयारी गरेको प्राधिकरणको आईपीओ निष्कासनमा अर्थ मन्त्रालयले सहमति जनाएसँगै आईपीओ जारी गर्न दिने प्रस्ताव उर्जा मन्त्रालयले मन्त्रिपरिषद्मा पठाएको हो ।
यसो त प्राधिकरणले सञ्चालक समितिको गत मंसिर १० गते बसेको बैठकले आईपीओ जारी गर्ने निर्णय गरेको थियो । प्राधिकरणले प्रतिसेयर १०० रुपैयाँ अंकित मूल्यमा १३० रुपैयाँ प्रिमियम थप गरी प्रतिकित्ता २ सय ३० रुपैयाँका दरले आईपीओ जारी गर्ने तयारी गरेको छ । आईपीओ जारी गर्न दिने उर्जा मन्त्रालयको प्रस्ताव मन्त्रिपरिषद्बाट स्वीकृत भए आईपीओ निष्कासनको थप प्रक्रिया अघि बढाउने विद्युत् प्राधिकरणले जनाएको छ ।
प्रिमियम मूल्यमा आईपीओ जारी गर्नका लागि विद्युत प्राधिकरणलाई इक्रा नेपालले ‘डबल ए प्लस’ क्रेडिट रेटिङ प्रदान गरेको छ । यसले प्राधिकरणको वित्तीय तथा आर्थिक दायित्व समयमै बहन गर्न सक्ने उच्च क्षमता सुरक्षित रहेको जनाउँछ । प्राधिकरणले संस्थाको वित्तीय पुनर्संरचना गरी नेपाल विद्युत प्राधिकरण ऐन, २०४१ बमोजिम संस्थाको सेयर सर्वसाधारणमा बिक्री गर्ने भएको हो ।
