काठमाडौं। महुली लघुवित्त वित्तीय संस्था लिमिटेडले आफ्नो १२औं स्थापना दिवसको अवसरमा वृक्षारोपण तथा बिरुवा वितरण कार्यक्रम सम्पन्न गरेको छ । संस्थाले ३२ वटा जिल्लाका ६४ वटा शाखा कार्यालय मार्फत वृक्षारोपण तथा बिरुवा वितरण कार्यक्रम सम्पन्न गरेको हो । 

बिरुवा संरक्षणलाई मुख्य प्राथमिकतामा राखी संस्थाको केन्द्रीय कार्यालयले अग्नीसाइर कृष्णासवरन गाउँपालिका वडा नं २ को अग्नीसाइर मन्दिर परिसर र अग्नीसाइर कृष्णासवरन गाउँपालिका २ र १ वडाहरु, शम्भुनाथ नगरपालिका वडा नं १ मा गरी करिब १५०० बिरुवा र वित्तीय संस्थाका अन्य शाखा कार्यालयले सदस्यलाई बिरुवा हस्तान्तरण गर्नुका साथै मन्दिर, स्कुल, अस्पताल परिसरमा करिब १०,००० वृक्षारोपण गरेका छन् ।

लघुवित्तले विश्वव्यापी तापमान वृद्धि, वायु प्रदुषण लगायत अन्य वातावरणीय समस्यालाई मध्य नजर गर्दै हरेक वर्ष वृक्षारोपण कार्यक्रमलाई विशेष प्राथमिकतामा राखी कार्यक्रम सञ्चालन गर्दै आइरहेको छ ।

१२ औं स्थापना दिवसको अवसरमा शुभकामना व्यक्त गर्दै संस्थाका प्रमुख कार्यकारी अधिकृत गंगाधर पाण्डेले महुलीले समाजमा बेग्लै स्थान बनाउन सफल भएकोमा कर्मचारीहरूलाई विशेष धन्यवाद दिँदै समुदाय र सेवाग्राही सदस्यहरू प्रति पारदर्शी र उत्तरदायी भई छिटो, सरल, सहज सेवा सँगै संस्थाको नारा सबैको लागी, सधैँको लागी व्यवहारिकरूपमै लागू गर्न निर्देशन दिएका थिए ।