काठमाडौं । राष्ट्रिय स्वतन्त्र पार्टीले नयाँ गठबन्धनमा सहभागी नहुने निर्णय गरेको छ । मंगलबार बसेको रास्वपाको सचिवालय बैठकले नयाँ गठबन्धनमा सहभागी नहुने भन्दै अर्को सरकार बन्ने प्रक्रिया सुरु हुने बित्तिकै मन्त्रीहरूलाई फिर्ता बोलाउने निर्णय भएको प्रमुख सचेतक सन्तोष परियारले जानकारी दिएका छन् ।
उनले भने, ‘नेपालको राजनीतिमा एकखालको अस्थिरता, चलखेलहरू भइरहन्छ । त्यो नहुनुपर्ने थियो । हामीले स्थायित्वको लागि प्रयासहरू पनि गरेका छौं । पछिल्लो समय जे भइरहेको छ त्यो देश र जनताको हकमा छ भन्ने हामीलाई लाग्दैन र यसले स्थायित्व दिन्छ भन्ने कुरा पनि लाग्दैन । यद्यपि यो घटना अगाडि बढि सकेपछि अब बन्ने गठबन्धनमा हामी सामेल हुँदैनौ । त्यो स्पष्ट छ । अर्को सरकार बन्ने प्रक्रिया सुरु हुने बित्तिकै मन्त्रीहरूलाई फिर्ता बोलाउँछौ । हामी सरकारमा जादैँनौ ।’
उनले नयाँ गठबन्धन देश र जनताको हकमा नभएको र यसले स्थायित्व पनि नदिने भन्दै यसमा सहभागी नहुने निर्णय गरेको बताए ।
