काठमाडौं। काठमाडौं महानगरपालिकाभित्र गुणस्तरहीन खाने तेल बिक्री हुने गरेको पाइएको छ । महानगरले १३ ब्रान्डका खाने तेलको नमुना परीक्षण गर्दा ४ ब्रान्डका तेल गुणस्तरहीन भएको पाइएको हो।
पक्वान, अमृत, फेमिली र क्वालिटी ब्रान्डको खाने तेलमा अखाद्य वस्तु भेटिएको महानगरले जनाएको छ। उक्त ब्यान्डहरूमा नेपाल सरकारले तोकेको पेरोक्साइड भ्यालु धेरै भएको पाइएको हो ।
मोरङको श्रीराम रिफाइन्ड आयलले उत्पादन गरेको पक्वान ब्रान्डको रिफाइन सोयाबिन तेलमा पेरोक्साइड र एसिड भ्यालु धेरै भएको पाइएको छ भने क्वालिटी आयल रिफाइनरी प्रालिले उत्पादन गरेको क्वालिटी ब्रान्डको रिफाइन सोयाबिन तेलमा सरकारले तोकेको मापदण्ड नपाइएको महानगरले जनाएको छ ।
त्यस्तै, अमृत ब्रान्डको रिफाइन सोयाबिन तेल पनि गुणस्तरहीन भेटिएको छ। फेमिली ब्रान्डको तोरीको तेलमा पनि पेरोक्साइड धेरै भएको पाइएको छ।
मापदण्ड विपरीत तेल उत्पादन गर्ने ब्रान्डहरूलाई दुई-दुई लाख जरिवाना तिराइएको महानगरले जनाएको छ।
