- अर्थ सरोकार सुदूरपश्चिम ब्युरो
धनगढी । थारु जातिहरुको विशेष पर्व माघिको पुर्वसन्ध्यामा धनगढीमा माघिमिलन कार्यक्रम सम्पन्न गरिएको छ । धनगढी उपमहानगरपालिका वडा नम्बर १४ सि गाउँमा थारु समाज सि गाउँ र ब्राईट भिजन ग्रुप फुलवारीको आयोजनामा कार्यक्रम सम्पन्न गरिएको हो ।
मंगलबार सम्पन्न गरिएको माघिमिलन कार्यक्रममा थारु संस्कृतिसँग सम्बन्धित सम्पुर्ण विषयवस्तुहरुको प्रवद्धन गरिएको थियो । कार्र्यक्रममा थारु संस्कृतिसँग सम्बन्धित खानाका विभिन्न परिकार, भेषभुषा, कला, नृत्य (सखिया, मुंग्राह) लगायतका संस्कृति प्रदर्शनि गरिएको थियो । कार्यक्रममा शुभकामना दिँदै पुर्व उद्योगमन्त्री तथा नेकपा एमालेका केन्द्रिय सचिव लेखराज भट्टले संस्कृति संरक्षण र जगेर्नाका लागि सबैले भूमिका खेल्नुपर्ने बताएका छन् । त्यस्तै पुर्व वन तथा वातावरणमन्त्री तथा पोलिटब्युरो सदस्य नारदमुनि रानाले संस्कृति आफुहरुको पहिचान भएको बताएका छन् । ‘हाम्रो संस्कृति संरक्षणमा हामी सबैले ध्यान दिन आवश्यक छ’, उनले भने ।
कार्यक्रमा पोलिटब्युरो सदस्य लिला भण्डारी, प्रदेश मामिला तथा विधायन समिती सभापति नेपालु चौधरी, वडा नम्बर १४ का अध्यक्ष रामबजारी थारु लगाएतको उपस्थिति रहेको थियो ।
