- अर्थ सरोकार सुदूरपश्चिम ब्युरो
धनगढी । प्रथम मेयर कप आमन्त्रित कराते प्रतियोगितामा धनगढी उपमहानगरपालिकाको टिमले दोस्रो स्थान हात पार्न सफल भएको छ । प्रदेश नम्बर १ झापा जिल्लामा नगर खेलकुद विकास समिती र नगर कराते खेल विकास समितीको सयुंक्त आयोजनामा सञ्चालन गरिएको प्रतियोगितामा कैलालीबाट प्रतिनिधित्व गरेको धनगढी उपमहानगरपालिकाको टिमले सम्पुर्ण प्र्रतियोगितामै दोस्रो स्थान हात पार्न सफल भएको हो ।
प्रतियोगितामा सहभागी भएकी बर्षा साउँदले काता विधामा प्रथम स्थान हात पारी गोल्ड मेडलिस्ट बनेकी छिन् । काता विधामै धनगढीका प्रदिप मगरले तेस्रो स्थान तय गर्दै ब्रोन्ज मेडल प्राप्त गरेको जिल्ला खेलकुद विकास समितीका अध्यक्ष ललित खत्रीले जानकारी दिए । त्यस्तै ५० किलो कुमेतीमा प्रथम भई पुरुषतर्फ अपिल शाहले गोल्ड मेडल प्राप्त गरेर बेस्ट फाईटर भएका छन् भने प्रदिप मगर ६० किलो कुमेतीमा प्रथम भएका छन् । यता वर्षा साउँदले ४५ किलो कुमेतीमा महिलातर्फ तेस्रो स्थान हात पार्न सफल भएकी छिन् भने ५० किलो कुमेतीमा रंन्जिता रावल तेस्रो भएकी छिन् । प्रतियोगितामा सहभागीमध्ये अर्की सहभागी अञ्जली कुमारी चौधरी भने ६० किलो कुमेतीमा महिलातर्फ तेस्रो भएकी हुन् ।
सम्पुर्ण खेलको नतिजा र प्राप्त गरेको पदकका आधारमा सम्पुर्ण खेलमै धनगढी उपमहानगरपालिकाको टिमले दोस्रो स्थान हात पार्न सफल भएको अध्यक्ष खत्रीले बताएका छन् । आईतबार खेलको समापन भएसँगै प्रथम मेयर कप आमन्त्रित कराते प्रतियोगितामा सहभागी हुन झापाल पुगेको धनगढी उपमहानगरपालिकाको टोली सोमबार फर्किदै छ ।
