- अर्थ सरोकार सुदूरपश्चिम ब्युरो
धनगढी । सोमबार असहमतिकैबीच धनगढी उपमहानगरपालिकाको आगामी आर्थिक वर्ष २०७९८० को बजेट पारित भएको छ । उपमहानगरपालिकाकी उपप्रमुखसहित नेकपा एमालेबाट निर्वाचित जनप्रतिनिधीहरुको असहमतिकैबीच बजेट पारित गरिएको हो ।
आज बसेको नगरपालिकाको आठौं नगरसभाको तेस्रो बैठकमा उपप्रमुखसहित एमालेका जनप्रतिनिधीहरुको असहमति रहँदा रहँदैपनि नगरप्रमुख गोपाल हमालले बहुमतले बजेट पास भएको घोषणा गरे । नगरसभाको सुरुवातदेखी नै बजेट तर्जुमा गर्दा आफ्नो सल्लाहबिनै एकलौटी रुपमा बजेट तर्जुमा गरेको भन्दै रानाले आपत्ति व्यक्त गरेकी थिईन् ।
दिउँसो नगरसभाको बैठक चलिरहँदा उपप्रमुखसहित एमालेका जनप्रतिनिधीहरुले विरोध जनाएर सभा बहिस्कार गरेपछि तनाव सृजना भएको थियो । त्यसका बाबजुत पनि एकलौटी रुपमा पदिय मर्यादा बिर्सिदै नगरप्रमुखले बजेट पारित गरेको उपप्रमुख रानाले आरोप लगाएकी छिन् ।
‘मेयरसाप र हाकिमसाप दुवैजना मिलेर मलाई एक्लो बनाए‘, उपप्रमुख रानाले भनिन्, ‘बहुमतको दम्भ देखाएर फेरीपनि नगरप्रमुखले जनताको आशामाथी कुठाराघात गरेका छन् ।‘ ‘वार्षिक कार्यक्रम पुस्तिका विधि र प्रक्रिया विपरित छ । कानुनसंवत म योजना तर्जुमा संयोजक भएपनि संविधानले दिएको अधिकारबाट नगरप्रमुखले मलाई बञ्चित गरेका छन् । अन्तिममा नेपाली कांग्रेसका जनप्रतिनिधीहरुले बजेट पारित गर्न दबाब दिएपछि नगरप्रमुखले बहुमतका आधारमा बजेट पारित भएको घोषणा गरेका हुन्‘- रानाले भनिन् ।
