काठमाडौं । गर्मीयाम सुरु भएसँगै डढेलोको जोखिम बढेको छ । विशेष गरी गर्मीयाममा तराईका जंगलहरुमा डढेलोको जोखिम उच्च हुनेगर्दछ । डढेलोका कारण जंगल मासिने र ठूलो मात्रामा क्षति हुने भएपछि कैलालीमा स्थानीय स्तरबाट पनि सतर्कता अपनाउन थालिएको छ ।
खासगरी तराईका भूभागमा रहेको जंगलहरुमा लाग्ने डढेलो नियन्त्रणमा प्रहरी, वन कार्यालय, स्थानीय तह र विभिन्न संघसंस्थाहरु सक्रिय बनेका छन् ।
यसैबीच कैलालीको कैलारी गाउँपालिकामा पर्ने बसन्ता करिडोर अन्तर्गतको जनसेवा सामुदायिक वनमा लागेको डढेलो नियन्त्रण गरिएको छ । शनिबार करिब ३५ हेक्टरमा लागेको डढेलो सिएफसीसी, ईलाका प्रहरी कार्यालय, सव डिभिजन वन कार्यालय, सशस्त्र प्रहरी, पत्रकार र स्थानीयको सहयोगमा नियन्त्रण गरिएको हो ।
डढेलो नियन्त्रणमा भूमिका खेल्ने सबैलाई सिएफसीसी, हसुलियाले धन्यवाद दिएको छ । साथै डढेलोको मुख्य कारक मानवीय गतिविधि भएकोले यसतर्फ चनाखो हुनसमेत संस्थाले सबैलाई आग्रह गरेको छ ।
