• अर्थ सरोकार सम्बाददाता

नवलपरासी । पूर्वी नवलपरासीमा थप २१ जना कोरोना संक्रमण पुष्टी भएको छ । भारतसँग सिमाना जोडिएको विनयी–त्रिवेणी गाउँपालिकामा १८ र कावासोती नगरपालिकामा शुक्रबार तीन जनामा संक्रमण पुष्टी भएको हो ।

जिल्ला स्वास्थ्य कार्यालयका प्रमुख केशव चापागाईंका अनुसार त्रिवेणी गाउँपालिकामा थपिएका संक्रमितमा वडा नम्बर ३, ४ र ५ का छन् । त्यसै गरी जिल्ला सदरमुकाम रहेको कावासोती नगरपालिकाका वडा नम्बर ५, ८ र १६ मा संक्रमित थपिएका हुन् । जिल्लामा शुक्रबार बिहानसम्म कुल संक्रमितको संख्या ६ सय ५ पुगेको छ । तीमध्ये ४ सय १७ जना निको भइसकेका छन् । कोरोनाबाट जिल्लामा तीन जनाको मृत्यु भइसकेको छ ।