">
काठमाडौँ । दशैँको मुखमा काठमाडौँबाट भारतको राजधानी दिल्ली जानभन्दा नेपालकै धनगढी जाने हवाई भाडा महँगो भएको पाइएको छ । आइतबार विभिन्न एयरलाइन्सको भाडा दर हेर्दा काठमाडौँबाट भारत जानभन्दा धनगढी जाने हवाई भाडा महँगो भएको पाइएको हो ।
दिल्ली जान ११ हजार दुई सय ८२ रुपैयाँ लाग्दा धनगढी जान भने १७ हजार १० रुपैयाँ रहेको पाइएको छ ।
दशैंको मुखमा यसरी हवाई कम्पनीहरुले भाडादर चर्को बनाउँदा घर जाने यात्रुहरु मारमा परेका छन् । छिमेकी देशको राजधानी जानुभन्दा आफ्नै देशको एक ठाउँ जान महँगो परेपछि सामाजिक संजालमा सरकारको चर्को आलोचना भईरहेको छ ।
हरेक वर्ष दशैँमा दिल्ली जानेआउने भाडा सस्तो हुन्छ भने नेपालका विभिन्न ठाउँमा जाने भाडा महँगो हुन्छ । जसले गर्दा यात्रुहरु मर्कामा पर्ने गरेका छन् ।
