काठमाडौँ । इसेवाको नाम प्रयोग गरेर ठगी गर्नेहरु बढेका छन् । इसेवाको नाम प्रयोग गरेर एटी अलर्ट नामक सर्ट कोडबाट इसेवाका ग्राहकहरूलाई एसएमएस पठाउने र त्यसबाट ग्राहकको खातामा पहुँच पुर्‍याई रकम चोरी गर्ने धन्दा ह्वात्तै बढेको पाइएको हो । 

यस्तो धन्दा कसले गरिरहेको छ भन्ने यकिन नभए पनि यसमा डाटा बेच्ने कुरामा इसेवाकै कुनै कर्मचारीको संलग्नता हुन सक्ने आशंका गरिएको छ । 

बेला बेला बिग्रिरहने इसेवाको नाममा ह्याकरले पैसा चोरेको गुनासो बढेपछि कम्पनीले त्यस्ता एसएमएसमार्फत आउने कुनै पनि लिंक क्लिक नगर्न आग्रह गरेको छ । कम्पनीबाट आउने सम्पूर्ण एसएमएस नोटिफिकेसनहरु इसेवा, इसेवा अलर्ट, ३२१३१ र ३२१२१ मार्फत मात्रै आउने इसेवाले स्पष्ट पारेको छ । यस्तै कम्पनीले ग्राहकरुको ओटीपी, एमपीन र पासवर्ड कहिल्यै नमाग्ने पनि सूचनामा उल्लेख गरेको छ । 

यद्यपि कम्पनी ग्राहकको पैसा चोरी हुँदा हुनुपर्नेजति संवेदनशील भने नभएको पाइएको छ ।