काठमाडौँ । नेपाल उद्योग वाणिज्य महासंघका अध्यक्ष चन्द्र ढकालले युएईमा रहेका नेपालीहरुलाई नेपालमा लगानी गर्न आह्वान गरेका छन् । नेपाली जनसम्पर्क समिति यूएईद्वारा नयाँ वर्ष २०८२ को शुभकामना अदान-प्रदान कार्यक्रमलाई सम्बोधन गर्दै ढकालले यस्तो आह्वान गरेका हुन् ।
पछिल्लो समय सुध्रिँदो अर्थतन्त्र र अवस्थाका बीच नेपालमा लगानीका थुप्रै सम्भावना रहेको भन्दै उनले युएईमा रहेको नेपालीहरुलाई आम्दानीको केही अंश नेपालमा लगानी गर्न आह्वान गरेका छन् ।
नेपालमा गरिएको लगानी खेर नजाने भन्दै अध्यक्ष ढकालले ‘नेपालमा लगानीको वातावरण छैन’, ‘प्रतिफल पाइँदैन’ भन्ने जस्ता हल्लाको पछि नलाग्न पनि आग्रह गरेका छन् । उनले नेपालमा लगानी गरे प्रतिफल पक्का पाइनेमा ढुक्क हुन पनि भनेका छन् ।
त्यस्तै, अध्यक्ष ढकालले नेपालमा लगानीका थुप्रै क्षेत्रहरु एक्सप्लोर गर्न बाँकी रहेको भन्दै ती क्षेत्रको पहिचान गरी लगानी विस्तार गर्न आग्रह गरेका छन् । विदेशमा रहेर नेपालीहरुले गर्ने लगानी र मिहेनत नेपालमा गरे नेपाल पनि छिट्टै समृद्ध बन्ने अध्यक्ष ढकालको भनाई रहेको छ ।
