काठमाडौँ । वैदेशिक रोजगारीका लागि विभिन्न देश पठाउने भन्दै रकम ठगी गर्ने दुई जना पक्राउ परेका छन् । पक्राउ पर्नेमा ४३ वर्षीया सजु श्रेष्ठ र ३० वर्षीय नारायण लाम्ताङ्गे रहेका छन् ।

पीडितले दिएको उजुरीका आधारमा उनीहरुलाई काठमाडौँ उपत्यका अपराध अनुसन्धान कार्यलयबाट खटिएको प्रहरी टोलीले पक्राउ गरेको हो ।

प्रहरीका अनुसार पक्राउ परेकी श्रेष्ठले आकर्षक तलबमा सर्बिया पठाउने भन्दै पीडितबाट २० लाख रुपैयाँ लिएर सम्पर्कविहीन भएकी थिइन् । त्यस्तै, लाम्ताङ्गेले ग्रिस पठाउने भन्दै १६ लाख ५० हजार ठगी गरेको प्रहरीले जनाएको छ ।

हाल उनीहरुलाई थप अनुसन्धान तथा आवश्यक कारवाहीका लागि वैदेशिक रोजगार विभाग पठाईएको छ ।

पछिल्लो समय राम्रो देश, आकर्षक तलबको प्रलोभनमा पारेर रकम ठगी गर्नेहरु बढेका छन् भने सोहि प्रलोभनमा फसेर ठगिनेहरु समेत बढेका छन् ।