काठमाडौँ । उर्जा जलश्रोत तथा सिंचाईमन्त्री दीपक खड्काले विकास समयको माग भएको र कसैले रोकेर नरोकिने बताएका छन् । इप्पानको २३औँ वार्षिक साधारण सभालाई सम्बोधन गर्दै मन्त्री खड्काले यस्तो बताएका हुन् ।
‘हामी बेरोजगारीका कुरा गरिरहेका छौँ । २८ हजार ५ सयको रोडम्यापलाई पछ्याउने हो भने पनि लाखौँ मान्छेले यहीँ रोजगारी पाउँछन् ।’, उनले भने, ‘विकास समयको माग हो ।’
त्यस्तै, उनले उर्जा सम्बन्धी विधेयक ल्याउँदैमा नआत्तिन पनि आग्रह गरेका छन् । ऐन ल्याउनै नहुने भन्नु गलत भएको भन्दै ल्याइएको ऐनमा संशोधन र परिमार्जनसहित अघि बढ्न सकिने खड्काको भनाई छ ।
मुलुकको हित अनुकुल कानून निर्माण हुने भन्दै आफ्नो मुलुकलाई हेरेर कानून निर्माण हुने भएकाले तर्सिनुपर्ने, आत्तिनुपर्ने कारण नरहेको पनि उर्जा मन्त्रीले बताएका छन् । बरु उद्देश्यका साथ उर्जा क्षेत्रको विकासमा लाग्नुपर्नेमा उनले जोड दिएका छन् । यता आरसिओडीको समस्या रहेको भने स्वीकार गर्दै त्यसका लागि कमिटी नै गठन गरेर आरसिओडी पनि प्रोजेक्टको अवस्था हेरेर थपिदिने भन्ने निष्कर्ष निकालेको पनि खड्काले बताएका छन् । ।
त्यस्तै, मन्त्री खड्काले उर्जा आयोजनाहरुको आइपिओ रोक्न कुनै आवश्यक नरहेको भन्दै संवादमार्फत समाधान गर्न सकिने बताएका छन् । उर्जा क्षेत्रको विकासका लागि सरकार खुला रहेको पनि मन्त्री खड्काले बताएका छन् ।
