काठमाडौँ । थुप्रै सहकारीका संचालक भागेपछि नेपाल बचत तथा ऋण केन्द्रीय सहकारी संघ (नेफ्स्कून)को कार्यक्रममा पूरै हलका सिट खाली हुन थालेका छन् । शनिबार ३८औँ स्थापना दिवस समारोहमा पनि हलका पूरै सिट खाली भएका हुन् ।
समारोहमा उपस्थितहरुले पनि सो कार्यक्रममा ‘धन्न हामी मुख देखाइरहेका छौँ’ भन्दै चर्चा गरेका थिए ।
अधिकांश सिट रित्तै देखिएको उक्त कार्यक्रममा बोल्दै संघका प्रमुख कार्यकारी अधिकृत (सिइओ) डा. शिवजी सापकोटाले २ हजार ४ सय वटा बचत तथा ऋण सहकारी संस्था (साकोस) को स्थलगत सुपरीवेक्षण गर्ने महत्वकांक्षी योजना सार्वजनिक गरेका छन् ।
उक्त योजना कार्यान्वयनका लागि उनले अब ‘स्क्यान’ नामक अनुगमन कार्यक्रम चलाउने घोषणा समेत गरेका छन् । यसका लागि नेफ्स्कूनले १ हजार ८७ कर्मचारीमध्ये ६७ जनालाई अनुगमनका लागि मात्र खटाएको बताएका छन् । कार्यक्रममा सिइओ सापकोटाले नेफ्स्कूनको वित्तीइ अवस्थाबारे पनि जानकारी गराएका थिए । जस अनुसार संघको सेयर पुँजी १ अर्ब ५० करोड, सदस्य बचत २० अर्ब, ऋण लगानी २२ अर्ब र कुल लगानी २३ अर्ब ७० करोड रुपैयाँ नाघेको छ ।
