काठमाडौँ । नगद अभाव भएपछि नेपाल विद्युत प्राधिकरणले ५ अर्ब रुपैयाँ ऋण लिएको छ । नगद अभावका कारण दैनिक सञ्चालन र निर्माण कार्यमै असर पर्न थालेपछी प्राधिकरणले सरकारसँग ५.३८ प्रतिशत ब्याजदरमा ५ अर्ब रुपैयाँ अल्पकालीन ऋण लिएको हो ।
यसो त प्राधिकरणले अर्थ मन्त्रालयसँग चालु आर्थिक वर्षमा ५ अर्ब र आगामी आर्थिक वर्षमा ५ अर्ब गरी कुल १० अर्ब रुपैयाँ अल्पकालीन ऋण मागेको थियो ।
त्यसमध्येको ५ अर्ब रुपैयाँ आएको प्राधिकरणका कार्यकारी निर्देशक हितेन्द्रदेव शाक्यले बताएका छन् । शाक्यका अनुसार उक्त रकम विभिन्न परियोजना तथा निर्माण क्षेत्रका बाँकी भुक्तानीका लागि प्रयोग भइरहेको छ ।
शाक्यका अनुसार प्राधिकरणले वन, ठेक्का र अन्य भुक्तानी गरेर करिब १२ अर्ब रुपैयाँ तिर्नुपर्ने दायित्व बाँकी छ । तर, नगद अभाव कारण प्राधिकरणको दैनिक सञ्चालन खातामा प्रयोग गर्त मिल्ने रकम २ अर्ब ४७ करोड मात्र छ । प्राधिकरणको ३ अर्ब ६८ करोड रुपैयाँ मुद्दती र ३ अर्ब ९५ करोड धरौटी खातामा राखिएको प्राधिकरणका कार्यकारी निर्देशक शाक्यले जानकारी दिएका छन् ।
