काठमाडौँ । बन्दीपुर केबलकार एण्ड टुरिजम लिमिटेडले आज (भदौ ११ गते) देखि आइपिओ खुला गरेको छ । पहिलो चरणमा स्थानीय र वैदेशिक रोजगारीमा रहेको नेपालीहरुका लागि आइपिओ बाँडफाँड गरेपश्चात कम्पनीले आजदेखि सर्वसाधारणका लागि आइपिओ खुला गरेको हो ।
यसो त कम्पनीलाई धितोपत्र बोर्डले ५८ करोड ६० लाख रुपैयाँ बराबरको ५८ लाख ६० हजार कित्ता सेयर निष्कासन गर्ने अनुमति दिएको थियो ।
जसमध्ये कम्पनीले ५ लाख ६६ हजार कित्ता सेयर आयोजना प्रभावित क्षेत्रका स्थानीय बासिन्दाहरुका लागि र ५ लाख २९ हजार ४०० कित्ता सेयर वैदेशिक रोजगारीमा रहेको नेपालीका लागि निष्कासन गरेर बाँडफाँड गरिसकेको छ । त्यस्तै, कम्पनीले कर्मचारीका लागि १ लाख ५८ हजार ८२० कित्ता र सामूहिक लगानी कोषहरुका लागि २ लाख ६४ हजार ७०० कित्ता छुट्याएर बाँडफाँड गरिसकेको छ ।
अब भने कम्पनीले दोस्रो चरणमा सर्वसाधारण लगानीकर्ताका लागि प्रतिकित्ता १०० रुपैयाँ अंकित मूल्यका दरले ४३ करोड ४१ लाख ८ हजार रुपैयाँ बराबरको ४३ लाख ४१ हजार ८० कित्ता सेयर निष्कासन गरेको हो । उक्त आइपिओमा न्यूनतम १० कित्ता र अधिकतम २० हजार कित्ताका लागि आवेदन दिन सकिनेछ । आवेदन छिटोमा १५ गते र ढिलोमा २५ गतेसम्म दिन सकिनेछ ।
आइपिओ निष्कासनका लागि काम्पनीले केयर रेटिङ्ग नेपालबाट ‘केयरएनपी डबल बी इस्यूअर’ रेटिङ्ग पाएको छ । यसले कम्पनीको दायित्व बहन गर्ने क्षमतामा औषत जोखिम रहेको संकेत गर्दछ ।
