काठमाडौँ । सम्राट सिमेन्ट, रोल्पा सिमेन्ट र नव नेपाल प्लास्टिक इन्डस्ट्रिजले बिजुलीको बक्यौता तिर्न सुरु गरेका छन् । नेपाल विद्युत प्राधिकरणले बक्यौता तिर्न अल्टिमेटम दिएपछि यी तीन उद्योगले बक्यौता तिर्न सुरु गरेका हुन् ।
यी तीन उद्योगले डेडिकेटेड तथा ट्रंक लाइनमार्फत बिजुली उपभोग गरेबापतको बक्यौता तिर्न सुरु गरेका हुन् । यी उद्योगले यसअघि बक्यौताको किस्ता तिर्न स्थगित गरेका थिए ।
प्राधिकरणका अनुसार यी उद्योगलाई यसअघि बक्यौता बापतको रकम चुक्ता गर्न २८ किस्ताको सुविधा दिइएको थियो । तर, केही किस्ता तिरेपछि उद्योगहरुले बाँकी किस्ता रोकेका थिए । तर, प्राधिकरणले पुनः ‘किस्ता तिर्नु’ भन्दै निर्देशन दिएपछि उद्योगहरुले पुनः किस्ता तिर्न सुरु गरेका छन् ।
सम्राट सिमेन्टले प्राधिकरणलाई २ करोड ७७ लाख रुपैयाँ बक्यौता तिर्न बाँकी छ भने रोल्पा सिमेन्टले ९९ लाख १२ हजार रुपैयाँ बक्यौता तिर्न बाँकी छ । यी उद्योगहरुले किस्ताबन्दीमा बक्यौता तिर्न थालेका छन् । तर, अन्य उद्योगहरु भने सम्पर्कमा नआएको प्राधिकरणले जनाएको छ । प्राधिकरणले उद्योगहरुलाई बक्यौता तिर्न कात्तिक २ गतेसम्मको अल्टिमेटम दिएको छ । त्यस अवधिमा पनि बक्यौता नतिरे वा सम्पर्कमा नआए लाइन काट्ने प्राधिकरणले चेतावनीसमेत दिइसकेको छ ।
